Gizartea -
Gertaera
Gorbea mendian istripua izan duen mendizale bat erreskatatu dute
Helikopteroz Galdakaoko ospitalera eraman dute mendizalea artatzeko. Antza denez, orkatilean lesioren bat du gizonezkoak.
Gorbea mendian istripua izan duen 45 urteko mendizale bat erreskatatu du gaur arratsaldean Ertzaintzak, Segurtasun Sailak jakitera eman duenez. Gizonezkoak orkatila zauritu du eta Galdakaoko ospitalera eraman dute helikopteroz.
Arratsaldeko lehen orduan, pertsona batek Larrialdietako Zerbitzuei eman die gertatutakoaren berri. Horren arabera, zaurituak orkatila batean min hartu du, eta ezin zuen ibili.
Berehala, Gurutze Gorriko kideak bertaratu dira istripuaren lekura, eta gizona inmobilizatu ostean gertuko landa eremu batera eraman dute. Han zegoen zain helikopteroa gizona Galdakaoko ospitalera eramateko.
Eusko Jaurlaritzako Segurtasun Saileko Larrialdi Zerbitzuetako tekniko batek koordinatu du erreskatea.