Laneko atseden-orduetan lapurtzeagatik gizon bat atxilotu dute Bilbon

Bilboko Udaltzaingoak hainbat lapurreten ustezko egilea atxilotu du. Azken bi asteetan, Bilboko zabalgunean hainbat lapurreta egin ditu dendetan eta botiketan.

49 urteko gizonezkoa Barakaldoko bizilaguna da eta larunbatean atxilotu zuten, 14:50ean, Maximo Agirre kaleko haurrentzako arropa denda batean lapurtzen saiatzen ari zenean, Udalak ohar batean jakinarazi duenez.

Ustezko lapurrari sei lapurreta egozten dizkiote azken 15 egunetan, azkena hala ere, ezin izan zuen gauzatu atxilotu egin baitzuten une horretan. Hiru botiketan, estanko batean eta jostailu-denda batean egin ditu lapurretak. Azken lapurreta haurrentzako arropa denda batean egiten saiatu zen.

Mozorrotuta joaten zen beti beisboleko txapela batekin eta eguzkitako betaurrekoekin. Dendetara iristen zenean, sukaldeko labana batekin egiten zion mehatxu dendariari dirua lapurtzeko.

Guztira, 1.300 euro lapurtu dituela uste dute.

Lapurreta guztiak Bilboko zabalgunean egin ditu. Dirudienez, Kale Nagusiko bere ohiko lantokian, 12:00etatik 16:00era zituen atseden-orduak aprobetxatzen zituen beste dendetan lapurretak egiteko. Ondoren, mozorroa kentzen zuen eta lanera itzultzen omen zen.

Aurreko astean lapurreta egindako botika bateko grabazioei esker, agenteek usteko lapurra ezagutu, eta jarraipena egin zioten. Mozorroa janzten zuela ikusi eta denda batera sartu zenean atxilotu zuten.

Miribillako polizia-etxean onartu zuen antzeko beste bost lapurreta egin zituela eta epaileak espetxera sartzeko agindu du.