San Prudentzio eguna ospatuko dute gaur Armentiako zelaietan

Arabarrek goizean goizetik ospatuko dute San Prudentzio eguna, ospakizunak atzo hasi baziren ere, ohiko Erretreta eta danborradarekin.

San Prudentzio eguna 09:00etan hasiko da ofizialki, Arabako zortzikoaren emanaldiarekin Probintzia plazan, Arabako Foru Aldundiaren egoitzaren parean.

Hala ere, tradizioari jarraituz, goizean goizetik milaka lagun elkartuko dira Armentiako zelaietan.

10:45ean hasita meza ospatuko dute Armentiako baselizan, eta erakundeetako ordezkariek parte hartuko dute. Eguerdian, urrezko domina emango dio Arabako Foru Aldundiak Jesus Obrero Fundazioari.

Hortik aurrera, jaigiroa izango da nagusi Armentiako zelaietan. Bertan, erromeriaz, herri kirol jaialdiaz eta perretxiko nahiz barraskiloz gozatzeko aukera izango da.

Erretreta eta danborrada

Erretretarekin hasi zituzten gasteiztarrek San Prudentzio Arabako zaindariaren omenezko ospakizunak. Tronpeta-jotzaileek eta atabal-jotzaileek Erretreta jo zuten 20:00etan Gasteizko Udaleko balkoian, eta ordubete geroago gauza bera egin zuten Aldundiaren jauregiko balkoian. Erretreta eta Erretreta artean, Garikoitz Mendizabal eta Aitor Furundarena musikariek, eta Folkon musika taldeak eta Indarra dantza taldeak emanaldia eskaini zuten.

San Prudentzioren Erretretak Erdi Aroan Gasteizen harresia zegoen garaian egiten zen dei militarra gogorarazten du. Hiriko ateak itxiko zirela iragartzen zuten.

Gauean, danborrada izan zen Probintzia plazan. Sukaldari eta soldaduez osatutako taldeak Probintziako Jauregian bildu ziren. Danborrak eta upelak hartuta, hiriko elkarte gastronomiko eta fanfarreen ordezkariak hirian barrena ibili dira, San Prudentzioren omenezko doinuak joz.

Iñigo Urkullu lehendakaria eta Bakartxo Tejeria Eusko Legebiltzarreko presidentea San Prudentzio eta Estibalizko Andra Mariaren jaiak direla eta, Erretretara joan ziren.