Aske utzi dute bikotekidea ustez hiltzeagatik atzo atxilotutako gizona

Bikotekidea hiltzea egotzita Errenterian atxilotutako gizona aske utzi dute epailearen aurretik igaro ostean. Izan ere, auzitegiko medikuek egindako azterketen arabera, emakumea berez hil zen, iturri juridikoek jakinarazi dutenez.

Atxilotutako gizonak Donostiako epaitegian deklaratu du gaur goizean, hasiera batean bikotekidea hiltzea egotzi baitzioten. Hala ere, auzitegiko medikuek egindako azterketen arabera, emakumea berez hil zen.

Biktima, 41 urtekoa, astelehenean eraman zuten Donostia Ospitalera. Emakumeak buruan kolpe handia zuen, eta beste hainbat zauri gorputzean eta aurpegian, eta atzo 10:30ean hil zen. Lesio horiek eraso baten ondorioz eragindakoak izan zitezkeela aintzat hartuta, ospitaleko arduradunek Ertzaintza ohartarazi zuten.

Polizia Autonomikoak ikerketa bat jarri zuen abian, gertatutakoa argitzeko, eta emakumearen bikotekidea atxilotu zuen.