Gizartea -
Meatzeta auzoan
Galdakaoko bere etxetik falta zen gizona hilda aurkitu dute
Ertzaintza 58 urteko gizonaren bila ari zen haren lankideek emandako abisuaren ondorioz. Antza denez, hildakoak egunak zeramatzan lanera joan barik.
Erredakzioa
Galdakaoko bere etxetik falta zen 58 urteko gizonezkoaren hilotza aurkitu du Ertzaintzak. Erreskate taldeek Usansolo auzoa eta Galdakaoko hirigunearen artean dagoen gune menditsu batean aurkitu dute.
SOS Deiak zerbitzuak aditzera emandakoaren arabera, hilotza Meatzeta izeneko lekuan aurkitu dute. Gizona Basozabal auzoan bizi zen, bakarrik.
Ertzaintza astelehen goizean hasi zen gizona bilatzen, haren lankideek abisua eman ostean. Antza denez, gizonak egunak zeramatzan lanera joan gabe.
Basozabal auzoan bizi zen
Agenteak hildakoaren etxebizitzara joan ziren, Basozabal auzoko baserri batera hain zuzen, eta, etxean ez zegoela egiaztatu ondoren, bilaketa lanak martxan jarri zituzten Galdakao eta Usansolo arteko eremuan.
