Jarrera arrazistak eta nagusikeria kasuak areagotu egin dira

Arrazismo sozialak eta nagusikeriak gora egin du Espainian, SOS Arrazakeria elkarteak salatu duenez, eta hiritar guztiei osasun zerbitzuetarako sarbidea bermatzeko eskatu du.

Arrazismoari buruzko txostenak 2012ko datuak biltzen ditu, eta, bertan irakur daitekeenez, geroz eta jende gehiagok baztertzen dute immigrazioaren fenomenoa. Joera horrekin larrituta eta diskriminazio egoerak handitzen ari direla ikusita, Berdintasun Legea betetzea aldarrikatu du SOS Arrazakeria elkarteak.

Osasungintzari dagokionez, paperik gabeko etorkinek osasun zerbitzuak jasotzeko eskubideak galdu dituztela salatu du SOS Arrazakeria elkarteak. Horrela, osasun arreta giza eskubide unibertsaltzat hartzeko eskatu die administrazioei eta erakundeei, hiritar guztiek osasun arreta jaso dezaten.

Gorrotoarekin loturiko delituen estatistikak biltzeko eskatu dio Mikel Mazkiaran SOS Arrazakeriako idazkariak Espainiako Gobernuari; izan ere, Espainia da Europar Batasunean diskriminazio jarreretan oinarritutako delitu horien datuak biltzen ez dituen herrialde bakarrenetakoa.

Bestalde, 2012an Lanzaroten patera baten eta Poliziaren itsasontzi baten artean izandako talka ikertzeko, Diputatuen Kongresuan batzordea irekitzeko eskatu du.