Poliziak 40 ile-apaindegitan sarekada egin du Bartzelonan

Esquadra mossoek, Bartzelonako Udaltzaingoak eta Lan Ikuskaritzak aldi berean 40 miaketa egin dituzte hiriko ile-apaindegietan, ustez sexu zerbitzuak eskaintzen zituztelako. Antza denez, ile-apaindegiak txinatar jatorriko pertsonek kudeatzen dituzte.

Poliziako iturriek jakitera eman dutenez, 300 pertsonek (poliziak, ikuskatzaileak eta interpreteak) operazioan parte hartu dute hiriko bederatzi barrutitan. Sarekada 18:00ak aldera hasi dute, eta batez ere Eixampleko barrutian egin dute.

Horrela, 20 bat miaketa hiriaren erdiguneko barruti horretan egin dituzte, iturriek azaldu dutenez.

Ile-apaindegi eta estetika denda txinatarretan prostituzioaren gorakada antzeman du Poliziak eta operazioa abian jartzea erabaki du, baimenak eta lan kontratuak behar bezala zituzten egiaztatzeko.