Adingabe bati erasotzeagatik atxilotutako gizona espetxera bidali dute

Atzo Azpeitian (Gipuzkoa) atxilotutako 33 urteko gizonezkoa espetxera bidali dute gaur, Segurtasun Sailak jakitera eman duenez. Adingabe bati jarraitu eta etxeko atarian eraso egin omen zion atxilotuak.

Atxilotua epailearen eskuetan utzi dute gaur. Epaileak Martuteneko kartzelan berehala sartzeko agindua eman du.

Gertakariak igande goizaldean jaso ziren, 04:30ean. Biktimak salaketan azaldu duenez, etxera zihoala, gizonezkoak bertaraino jarraitu zion, eta, etxeko atarian sartu zenean, eraso egin zion.

Gizonezkoak adingabearekin borroka egin zuen. Lurrera bota eta gelditzen saiatu zen, baina biktimaren oihuek bizilagunak ohartarazi zituzten. Auzokoek erasotzailea atxiki egin zuten, Azpeitiko Udaltzaingoaren patruila bat heldu zen arte.

Atxilotua, ondoren, Ertzaintzaren esku utzi zuten, eta epailearen aurrera eraman dute gaur.