Bi atxilotu Bilbon eta Etxebarrin indarkeria matxista egotzita

Ertzaintzak 42 eta 38 urteko bi gizonezko atxilotu zituen igandean Bilbon eta Etxebarrin, indarkeria matxista egotzita, Jaurlaritzaren Segurtasun Sailak jakitera eman duenez.

Aurreneko atxiloketa Etxebarrin egin zuten, goizaldean. Herritar batek poliziari hots egin zion, ondoko etxebizitza batean emakume baten aurkako erasoa salatuz.

Tokira iristean, emakume batek bere senarrarengandik jasotako tratu txarrak salatu zituen ertzainen aurrean. Emakumea oso urduri zegoen eta, minutu batzuk lehenago, senarrak jo egin zuela azpimarratu zuen.

Ustezko erasotzailea etxean zegoen eta, horrenbestez, Ertzaintzak atxilotu egin zuen.

Bestalde, igande arratsaldean, emakume batek bere bikoteak egindako tratu txarrak eta mehatxuak salatu zituen Bilboko polizia-etxean.