Gripearen eraginez, 33 pertsona egoera larrian ospitaleratu dituzte

Gripearen eraginak gora egin du Euskal Autonomia Erkidegoan 2014. urteko lehen astean, eta, aurreneko kasuak hauteman zituztenetik, 33 pertsona egoera larrian ospitaleratu behar izan dituzte. Horietatik 19k zainketa intentsiboetako unitatean egon behar izan dute.

Gaur Jaurlaritzaren Osasun Sailak jakitera eman duenez, urtarrileko aurreneko egunetan 100.000 biztanleko 255,63 kasu izan dira Euskadin; igoera "garrantzitsua", aurreko datuekin alderatuz (100.000 biztanleko 101,48 kasu).

Iragan asteko datuen arabera, gehien gaixotu direnak 0 eta 4 urte arteko umeak izan dira (809); ondoren, 5 eta 14 urte arteko umeak izan dira, 100.000 biztanleko 344 kasurekin.

Orain arte, A motako gripearen birusa hauteman du Osakidetzak. Ospitaleratu behar izan dituzten pertsonen % 61ek ez du txertorik jaso.