Kale bat itxita Gasteizen, kutxatila batean leherketa izan ostean

Gasteizeko Diputazio kaleko kutxatila batek eztanda egin du gaur, eta Udaltzaingoak kalea itxi behar izan du. Ez da inor zauritu, eta ez dute bertako bizilagunak etxetik atera beharrik izan.

Gasteizeko Udaleko iturriek adierazi dutenez, 14:00etan izan da eztanda Iberdrolaren kutxatila batean. Antza denez, su hartu du eta kea botatzen hasi da.

Enpresa horretako langileak leherketa izan den tokira gerturatu dira. Dirudienez, eztandak tentsio baxuko lau linea kaltetu ditu, eta 110 bezero argindarrik gabe utzi ditu, Iberdrolaren iturrien arabera.

Zirkuitulabur batek eragin du eztanda, eta, lekukoen arabera, "ikusgarria" izan da, lurretik kea ateratzen baitzen. Zorionez, ez du ondorio larririk izan.

Iberdrolak adierazi duenez, enpresako teknikoak argindarrik gabe gelditu diren 110 bezeroei ahalik eta azkarren horniketa itzultzen saiatzen ari dira.