Homizidio arduragabeagatik zigortuko dute Basauriko krimenaren egilea

2012an Basaurin pertsona bat tiroz hil zuen gazteak arduragabekeriazko homizidioa egin zuela ebatzi du epaimahaiak, eta bere buruaren bidezko defentsan jokatu zuela iritzita, epaileak behin-behinean aske utzi du.

Fiskaltzak 14 urteko kartzela-zigorra eskatu zuen Manuel Garciarentzat (28 urte), homizidioa leporatuta. Izan ere, Fiskaltzak uste du Garciak erosi behar zuen kilo erdi kokaina ez ordaintzeko hil zuela Alexander Rojas. Epaimahaiak, baina, "arduragabekeriazko homizidioa" leporatu zion atzo Bizkaiko Probintzia Auzitegian emandako ebazpenean.

Epaimahaiaren ustez, frogatuta geratu da Manuel Garcia Alexander Rojasekin geratu zela Basaurin droga kontu batzuk zirela medio. Topaketa horretan, Rojasek pistola atera omen zuen. Orduan, Garciak, "bere bizitza babesteko asmoz", aurre egin zion, eta, borrokan ari zirela, pistolak tiro egin eta balak biktima jo zuen.

Ebazpen horren aurrean, eta arduragabekeriazko homizidioa urtebete eta 4 urte arteko zigorrarekin zigortzen denez, Fiskaltzak eta akusazio partikularrak bi urte eta erdira jaitsi dute zigor eskaria.

Epaileak aurki emango du ebazpena, baina dagoeneko iragarri du horri egotzitako delituaz (nahita egindako homizidioa) absolbitu egingo dutela.