Organoak salerosteko saiakera bat galarazi dute Espainian

Espainiako Poliziak galarazi egin du organo bat salerosteko saiakera bat, eta bost lagun atxilotu ditu. Gibel transplantea behar zuen libanoar batek 40.000 euroren truke lortu nahi zuen organoa. Bost atxilotuak aske utzi dituzte, horietako hiruri legez kanpoko organoen trafikoa egotzita.

Poliziak jakitera eman duenez, libanoar dirudun bat Espainiako Estatura joan zen, baliabiderik ez zuen immigrante batek ustez bere borondatez gibelaren zati bat saldu behar ziolako. Azkenean, baina, legez kanpoko transplantea ez zen egin, Espainiako Estatuko transplanteen kontrolerako sistemari esker, aipatu iturrien arabera.

Hala ere, gobernuz kanpoko erakunde bateko kide batek ohartarazi zuen asmo horretaz, eta orduan abiatu zuen ikerketa Espainiako Poliziak. Atxiloketak Valentzian egin dituzte, eta, gizonezko libanoarraz gain, aberats horri organo-emailea bilatzen lagundu zioten lau pertsona atxilotu dituzte.