Astebete da Iñaki Garcia gazte donostiarra desagertu zenetik

Gaur, igandea, astebete egin du Iñaki Garcia Donostiako gazteak desagertuta. Aurreko igandeko goizaldetik geroztik senideek ezta lagunek ere ez dute haren berririk jaso.

Alexander Urbieta desagertutako gaztearen lagun batek beste egunean azaldu zuenez, larunbat gauean lagun batzuekin Astigarragako sagardotegi batera joan zen, eta, zertxobait geroago, "nahiko mozkor" eta "afaldu gabe" irten zen.

Urbietak adierazi duenez, Iñaki herrira iritsi zen, neska bati deitu zion eta harekin egon zen 00:30ak arte. Ordu horretan, taxien geltokira lagunduko ziola esan zion lagunak, "oso mozkor zegoelako".

Halere, Iñakik eskaintzari uko egin zion "haserre", eta Donostiako Martutene auzorantz oinez abiatu zen. Bertan, herritarren laguntzari esker senideek jakin dutenez, sagardotegitik irteten ari zen talde batek lagundu zion autobus-geltokira, "nahiko mozkor eta erortzen ari zela" ikusi zutelako.

Igande goizaldean, ordu bata aldera, pertsona talde horrek autobusa hartu zuen, baina hura geltokian geratu zen. Bertan ikusi zuten azkenekoz.

Geroago, Iñakiren lagunek mugikorrera deitu zioten, igandean, baina alarmak ez ziren piztu astelehenean lanpostura joan ez zen arte. Familiak egun horretan aurkeztu zuen salaketa Ertzaintzaren aurrean, eta senideek gaztearen irudia duten kartelak jarri dituzte hainbat gunetan, hura aurkitzeko asmoz.

Ertzaintzak, jasotako informazioan oinarrituta, bilaketa lanei ekin zien asteazkenean, Urumea ibaian. Ostiraleko azken orduan, bertan behera geratu ziren hiru egun miatzen eman eta gero, arrastorik topatu gabe.

Halere, Iñaki Garciaren lagunek bilaketari eutsi egin diote, ziurtzat ematen baitute gazteari zerbait gertatu behar izan zaiola, gauetik egunera modu horretan desagertzeko.