Gizartea -
Emakumeen kontrako indarkeria
Gizon bat atxilo, bikotekidea jo eta autoarekin harrapatu duelakoan
Jo aurretik, bortxatzen saiatu da. 35 urteko gizonezko bat atxilotu du Ertzaintzak.
Erredakzioa
35 urteko gizon bat atxilotu dute Lasarten, bikotekideari eraso diolakoan. Hasieran bortxatzen saiatu omen da, eta lortu ez duenez, jo egin du eta autoarekin harrapatu du. Poltsa lapurtu diola ere jakinarazi du Segurtasun Sailak.
03:30ean jazo da erasoa, Lasarten. Ordu horretan, zauritutako emakumearekin topo egin duen lagun baten deia jaso du Ertzaintzak.
Erasoa gertatu den lekura heldu, eta biktima artatu dute. Buruan, aurpegian, besoetan eta hanketan hainbat zauri zituela ikusita, ospitalera eraman behar izan dute.
Aipatutako iturriek zehaztu dutenaren arabera, gizonak bikotekidea bortxatzea lortu ez duenez, hainbat kolpe jo dizkio, eta gero, poltsa eta bertan zeukan dirua lapurtu dizkio. Ondoren, autoan sartu da, eta emakumea harrapatu du.
Ustezko erasotzailea 10:30ean aurkitu dute Errenterian. Emakumeen kontrako indarkeria egotzita atxilotu dute, eta orain ertzain-etxean dago, epailearen aurrera eramateko zain.
