Aparteko arazorik gabe, irteera operazioaren hasieran

Aste Santuko operazio bereziaren irteera faseko lehen orduetan normaltasuna nagusi izan da EAEko errepideetan. Ez da istripu larririk gertatu. Hala ere, auto-ilarak izan dira A-8 autobidean, Muskizen, Kantabriako noranzkoan, eta AP-1eko sarbidean, Armiñoneko loturan.

Segurtasun Sailak jakitera eman duenez, auto-ilara garrantzitsuenak arratsaldean gertatu dira A-8an, Muskizen (Bizkaia). Zauriturik gabeko istripu batek 6 kilometroko auto-ilarak sortu ditu Kantabriako noranzkoan, 18:30etik 19:15etara.

Arratsaldeko lehen orduetan kilometro eta erdiko auto-ilarak izan dira A-1ean, Armiñonen, Burgoseko noranzkoan.

Bi ezbehar

Segurtasun Sailak jakinarazi duenez, hiru pertsona zauritu dira bi istriputan, azken orduetan.

14:55 aldera kamioi bat errepidetik atera da N-1ean, Tolosan, Madrilgo noranzkoan. 60 urteko gidaria zauritu da, eta Arantzazuko ospitalera eraman behar izan dute.

Bigarren istripua N-634 errepidean gertatu da Mallabian. Motorzale batek auto baten aurka talka egin du Areitioko mendatean. 36 urteko motor-gidaria Mendaroko ospitalera eraman dute eta auto-gidaria (42 urte) arin zauritu da.