Montserrat Caballe inputatu dute iruzur fiskala egitea egotzita

Bartzelonako argibideetako epaile batek inputatu gisa deklaratzera deitu du Montserrat Caballe Kataluniako sopranoa. Fiskaltzak kereila aurkeztu zuen eta Andorran egoitza duela simulatuz 508.462 euroko iruzurra egitea leporatzen dio.

Iturri juridikoek jakitera eman dutenez, Caballek maiatzaren 9an deklaratu beharko du. Ustezko iruzur fiskala 2010eko errenta aitorpenean (PFEZ) egin zuen.

Opera-kantariaren aurka kereila aurkeztu zuen Bartzelonako Delitu Ekonomikoen Fiskaltzak. 2010eko PFEZren aitorpena Espainiako Ogasunaren aurrean ez aurkeztea egotzi dio Fiskaltzak Caballeri. Horrela, grabaketetan eta emankizunetan lortutako mozkinen zergak ordaintzea saihestu zuen ustez, dirua Andorrako banku batean gordetzen zuelako.

Fiskaltzak kereilan azaltzen duenez, akusatuak PFEZren aitorpena Espainian aurkeztu behar zuen, Bartzelonan bizi zelako eta "artista liriko bezala, kontzertuetan parte hartzeko eta musika grabaketak egiteko" bakarrik herrialdetik ateratzen zelako.