Bizkaiko Medikuen Elkargoak Osasun Campus berria sortzea babestu du

Bizkaiko Medikuen Elkargoak Medikuntza Fakultatea eta Odontologia batuta izango dituen Osasun Campus berria egiteko eskaera babestu du, komunikatu batean adierazi duen moduan.

Horrela, EHUko Medikuntza, Odontologia, Erizaintza eta Fisioterapiako ikasle eta irakasleek asteazkenean egindako eskaerarekin bat egin du, Euskal Herriko Unibertsitateko Osasun Fakultateak eta Eskolak batzeko gune berezi bat sortzeko.

Bizkaiko Medikuen Elkargoaren esanetan, proiektua duela 40 urte baino gehiago hasi ziren diseinatzen, Bilboko Unibertsitate Autonomoa sortu zenean (1968), eta ordutik gaurdaino, Medikuntza eta Odontologia Fakultateak hainbat egoitza izan ditu, “aldi baterako eta behin-behinean, eta behin betiko egoitza bihurtu dira”.

Horren arabera, gaur egun, 1., 2. eta 3. mailak Leioako Campusean ematen dituzte, Erizaintza eta Fisioterapia Eskolen egoitza berean. Instalazio horiek ez dute ezelako erreformarik izan egin zituztenetik, 70eko hamarkadatik.

Bestalde, ikasketa klinikoak (4., 5. eta 6. mailak) lau lekutan ematen dira: Basurtun, Gurutzetan, Donostian eta Gasteizen.

Basurturen kasuan, Medikuntza Fakultatea hartu zuen eraikinean, instalazioak sortu zituztenean zeuden moduan daude oraindik, ez baita konponketarik egin “lehenago edo geroago Fakultate berri bat egingo duten aitzakiaz”.

Horren ustez, “ezin da atzeratu” Osasun Fakultateak eta Eskolak hartuko lituzkeen eta Basurtuko Unibertsitate Ospitaleko lurretan egongo litzatekeen Campusa eraikitzeko proiektua onartzea, aurrekontua hornitzea eta egitea.