Neska bat jipoitu dute Bilbon, zigarro bat ez emateagatik

Ertzaintzak 20 urteko emakumezkoa atxilotu du, zigarro bat ukatu zion beste neska bati jipoia emateagatik. Biktimari laguntzen saiatu zen beste pertsona bati ere eraso egin zion atxilotuak.

Segurtasun Sailak aditzera emandakoaren arabera, erasoa astelehenean izan zen, Bilboko Zabalburu Plazan, 14:00 aldera. Ustezko erasotzailea eta adingabeko bat espaloian eserita zeuden bi neskarengana hurbildu ziren tabakoa eskatzeko.

Ezezkoa jaso eta jarraian, 20 urteko emakumezkoak hainbat muturreko eta ostiko eman zizkion eserita zegoen nesketako bati, iletik tira egin zion eta lepoan erre egin zuen zigarro batekin.

Emakume heldu batek erasoa ikusi eta biktima laguntzen saiatu zen, baina ustezko erasotzaileak bere kontra ere egin zuen, besoan hainbat haginkada emanda. Ondorioz, zauriak izan zituen eta betaurrekoak hautsi zitzaizkion. Hiltzeko mehatxuak ere egin zizkioten.

Erasoaren lekutik gertu zeuden Ertzaintzako agenteek erasotzailea atxilotu zuten, lesio delitua eta hiltzeko mehatxuak egitea leporatuta.

Atxilotuarekin zihoan adingabea auzipetu egin dute lesio falta egotzita eta erasoan parte hartzeagatik. Polizia-etxera eraman eta, ondoren, familiaren esku utzi zuten.