Ibaigane eskolako pertsona guztiak berriro lanean jartzea eskatu dute

ELA eta LAB sindikatuek Bilboko Ibaigane ikastetxeko langile taldea osatzen duten 51 pertsonak berriro lanean jartzea eskatu diote Eusko Jaurlaritzari eta Kristau Eskola elkarteari. Ostegun honetan itxi dituzte guztiz ateak.

Ohar batzuen bitartez, ELA eta LAB sindikatuek esan dutenez, Jesusen Bihotza kongregazioaren “kudeaketa txarragatik eta nahasiagatik” zentroa itxi egingo zela iragarri eta hilabete geroago, langileek “oraindik ez dakite zein izango den euren etorkizuna” irailean.

Sindikatuen arabera, ikastetxe horretan ikasten ari ziren haurren “familiei irtenbidea eman die” Eusko Jaurlaritzak, baina langileei ez die ezer eskaini.

51 langileak ikasleak ezarri dituzten zentro kontzertatuetan edota Kristau Eskolako beste zentroetan jartzea eskatu du ELAk. Langileei “berehala” irtenbide bat ematearen alde egin du LABek.