Bikote bat atxilotu dute Getxon, 6 hilabeteko umea bakarrik uzteagatik

Ertzaintzak bi pertsona atxilotu zituen igandean Getxon, sei hilabeteko euren umetxoa kalean bakarrik uztea egotzita, Segurtasun Sailak eitb.com-i azaldutakoaren arabera.

20:45ean, bizilagun batek Ertzaintzari hots egin zion, umetxoa Getxoko Sarrikobaso kalean bakarrik zegoela ohartaraziz.

Ertzaintzako agenteak gurasoen zain egon ziren, baina ez ziren agertu, eta umea Getxoko polizia-etxera eraman zuten.

Ondoren, gurasoak euren kabuz joan ziren komisariara, eta, Ertzaintzarekin hitz egin ondoren, atxilotu egin zituzten, umea bakarrik uztea leporatuta.

Gurasoek atzo deklaratu zuten epailearen aurrean. Umea, berriz, Bizkaiko Foru Aldundiko zerbitzu sozialen esku geratu da.