Sei gizonezko atxilotu dituzte Diman, hiru adingabe jipoitzea egotzita

Ertzaintzak sei gizonezko atxilotu ditu Diman, hiru adingabe atxiki eta jipoitzeagatik.

Segurtasun Sailak jakitera eman duenez, hiru gaztetxoek kalamu landareak ostu zituzten larunbatean Dimako baserri batean. Landareen jabeak segika joan zitzaizkien, eta burua txorrokoz estalita, derrigortuta eraman zituzten baserri alboko basora. Han, jipoitu eta pistola batez mehatxu egin omen zieten.

Kolpatuta eta biluzik utzi zituzten baso batean. Bi orduz noraezean ibili ostean, adingabeek kanpaleku bat aurkitu zuten eta bertan zeudenen laguntzarekin, salaketa jarri zuten.

Ertzaintzak sei gizon atxilotu zituen atzo hiru adingabeak legez kanpo atxikitzea, mehatxuak egitea eta lapurreta leporatuta.

Dimakoarekin 12 kalamu baratze atzeman eta 25 pertsona atxilotu ditu Ertzaintzak EAEn.