Gizartea -
Abortatzeko eskubidea
Adingabeen % 12k bakarrik abortatzen dute gurasoen baimenik gabe
Tratu txarrak jasateko arriskuan daudela edo familian babesik ez dutela argudiatzen dute gurasoei baimenik eskatzen ez dieten neskatoek.
Erredakzioa
Espainiako Gobernuak abortatzea galarazi nahi die gurasoen baimena ez duten adingabeei. Estatistiken arabera, baina, 16 eta 17 urteko neskato gehienak gurasoekin batera joaten dira haurdunaldia etetera, eta bakarrik joaten direnek tratu txarrak jasateko arriskuan daudela argudiatzen dute.
Haurdunaldia Eteteko Klinika Baimenduen Elkarteak (ACAI) azaldu duenez, adingabeen % 87,62 gurasoekin edo tutore legalekin batera joan ohi dira abortatzera. Gainerako % 12,38k baimena eskatu gabe abortatzen dute, tratu txarrak pairatzeko arriskuan daudela, familian babesik ez dutela, gurasoak espetxean daudela, herrialdean bakarrik bizi direla edo gurasoek eurek alabekin abortatzera joan nahi ez dutela argudiatuta.
"Datu horiek erakusten dutenez, oso gutxi dira gurasoen baimenik gabe abortatzen duten adingabeak, eta, gainera, oso kalteberak dira; horrenbestez, salbuespen hori [baimenik gabe abortatu ahal izatea] kentzen badiete, klandestinitatera zigortuko dituzte, horien bizia arriskuan jarrita”, azaldu zuen Francisca Garcia ACAIko presidenteak, azaroan inkesta horren emaitzak aurkeztu zituenean.
Horren ildotik, egun indarrean dagoen legea aldatzeko arrazoirik ez dagoela esan zion orduan Garciak PPri, eta sexuari buruzko hezkuntza indartzeko eta emakume kolektibo horri laguntzeko estrategia zehatzak sustatzeko deia egin zion.
