Gizartea -

Ikerketa

Egunean 4,3 orduz erabiltzen dute euskaldunek sakelakoa

Era berean, galdetutakoen % 30,4k dio sakelakoarekiko menpekotasuna duela.

Egunean 4,3 orduz erabiltzen dute euskaldunek sakelakoa. Argazkia: EITB.EUS
Sakelako telefonoa
Egunean 4,3 orduz erabiltzen dute euskaldunek sakelakoa. Argazkia: EITB.EUS

AGENTZIAK | ERREDAKZIOA

Whatsapp Facebook Twitter Telegram Email

Euskaldunek egunean 4,3 orduz erabiltzen dute batez beste sakelako telefonoa, Espainiako biztanleek baino 0,5 ordu gehiago. Ia erdiak (% 43,5) onartu du orduan 10 aldiz begiratzen duela pantaila, eta % 30,4k dio sakelakoarekiko menpekotasuna duela.

Rastreator.com atariak egin duen ikerketak eman ditu ezagutzera datu horiek. Dionez, gainera, euskaldunen % 62k ezingo luke sakelako telefonorik gabe egon egun bat baino gehiagoz.

Hamarretik bik onartu dute gidatzen ari diren bitartean begiratzen dutela telefonoa, estatuko zifrarik altuena, eta gehiengoak (% 67,4) lanean ari den bitartean sakelakoa erabiltzea onartu du.

Ikerketaren arabera, Extremadurako biztanleak (4,5 ordu), Madrilgoak (4,4 ordu) eta Euskadikoak (4,3 ordu) dira sakelakoa gehien erabiltzen dutenak. Gutxien erabiltzen duten autonomia erkidegoak ondorengoak dira: Galizia (2,9 ordu), Nafarroa (2,9 ordu) eta Asturias (2,8 ordu).

Euskaldunen % 30,4k uste du telefonoarekiko menpekotasuna duela. Espainiako biztanleen artean daturik altuena da hori, eta batez bestekoa baino 12 puntu handiagoa.

Herritarren % 6,5ek dio ezin duela telefonoa begiratu gabe bost minutu baino gehiago egon eta 23,91k uste du telefonorik gabe bizi ahal izango lukeela. Gehiengoak (% 65,22) telefonoa begiratzen du lagunekin dagoen bitartean, baina askori (% 58,70) ez zaio gustatzen gainerako lagunak telefonotik esekita egotea.

% 43,48k dio telefonoa begiratzea dela goizean jaikitzen denean egiten duen lehen gauza, baita oheratzerakoan egiten duen azkena ere.

Hau zure interesekoa bada, baliteke beste gai hauek ere izatea
Telefonia mugikorra albisteak