Gizartea -
30 euro hilean
Diru-sarrerak bermatzeko errenta kuotetan itzuli ahal izango dute
Gehiegi kobratu zuten hartzaileek dirua 30 euroko kuotetan bueltatzeko aukera izango dute, baina neurria arazo ekonomiko larriak dituzten familiei soilik aplikatuko zaie.
Agentziak | Erredakzioa
Diru-sarrerak bermatzeko errenta gehiegi kobratu zuten hartzaileek dirua 30 euroko kuotetan itzultzeko aukera izango dute, baina arazo ekonomiko larriak dituzten kasuetan soilik.
Eusko Legebiltzarrak kuota hori ezartzea eskatu zuen. Lanbidek egindako ordainketa desegokiak modu horretan bueltatzeko aukera ezartzea proposatu zuen Gasteizko Ganberak iragan ekainean, Eusko Jaurlaritzako Enplegu eta Gizarte Politikarako Saileko iturriek gogorarazi dutenez.
30 euroko kuota arazo ekonomiko oso larriak dituzten familiei soilik aplikatuko zaie. Gainerakoei diru-laguntzaren % 30 kenduko die Lanbidek hilean. Guztira, Lanbidek 87 milioi euroko ordainketa desegokiak egin zituela uste du Eusko Jaurlaritzak.
30 euroko kuota onartu baino lehen, dirua itzultzeko baldintzak arazo ekonomiko larriak dituzten familiekin negoziatzen ari zen Lanbide, horiek oinarrizko beharrizanei aurre egin ahal izateko, iturri berdinek azaldu dutenez.
