Bi pertsona adarkadaz larri zauritu dira Faltzes eta Leringo jaietan

Bi gizon adarkadaz larri zauritu ziren atzo Faltzes eta Lerin herrietako jaietan, Nafarroako Gobernuak ohar bidez jakitera eman duenez.

Faltzes herrian, 48 urteko martzillar batek adarkada jaso zuen sabelean bigantxetan parte hartzen ari zela. Nafarroako Ospitalera eraman behar izan zuten, baina haren bizitza ez dago arriskuan.

Bestalde, Lerinen, Zarrakazteluko 20 urteko gizonezko bat larri zauritu zen, izterrean bi adarkada jasota. Gertakaria 20:30ean jazo zen, eta zauritua Nafarroako Ospitalera eraman zuten. Asteburuan gazte bat hil zen Leringo jaietan, sabelean adarkada bat jasota.

Nafarroako Foruzaingoak ikerketa zabaldu du gertaturikoa argitzeko.