Gizon bat atxilotu dute pisukideari ganibet batekin eraso egiteagatik

Ertzaintzak 53 urteko gizonezko bat atxilotu du goizalde honetan Bilbon, pisukideari ganibet batekin eraso egitea leporatuta, Herrizaingo Sailak ezagutzera eman duenez. 38 urteko biktima Gurutzetako Ospitalera eraman dute: konortea galduta, zauri larri ebakiduna du bularrean.

Jazoera 05:00ak aldera izan da, Basurtuko auzoan. Lagun batek larrialdi-zerbitzuari deitu dio, arma zuriz zauritutako lagun baten berri emateko.

Ertzaintzako hainbat agente etxebizitzara bertaratu direnean, eskaileretatik jaisten zuen gizonezko bat aurkitu dute, eta hura atxiki dute.

Behin etxebizitzan, ertzainek sukaldera jo dute eta gizonezko bat aurkitu dute, zoruan botata eta konorterik galduta. Bularrean zauri larri ebakiduna zuenez, anbulantzia batek biktima artatu du eta geroago, Gurutzetako Ospitalera eraman.

Bi gizonezkoak pisukideak dira, eta errieta baten bitartean, horietako batek besteari eraso egin dio ganibet batekin. Ertzaintzak ganibet bat eraman du bertatik.

Eskaileretan atxikitutako gizonezkoa ustezko erasotzailea delakoan, Ertzaintzak hura atxilotu eta polizia-etxera eraman du.