Lau kaputxadun armatu pisu batean sartu ziren atzo Gasteizen

Hiru adingabe eta 21 urteko gazte bat Gasteizeko pisu batean sartu ziren atzo, aurpegiak txanoekin estalita eta labanak eskuan zituztela, etxebizitzako dirua lapurtzeko asmoz.

Gertaera goizeko 7:30ak inguruan jazo zen, Legutioko atea kalean. Ordu horretan jaso zuen Ertzaintzak lapurreta saiakera ohartarazten zuen deia.

Salatzaileek lapurretako bat atxikitzea lortu zuten, 16 urtekoa. Ertzaintza heldu zenean, atxilotu egin zuen, lapurreta saiakera egotzita.

Lehendabiziko atxiloketa horren ostean, Ertzaintza ikertzen hasi zen, eta, horren ondorioz, 16 urteko beste mutil bat atxilotu zuen bi ordu geroago, ikastetxean zegoela.

Ondoren egindako ikerketek lapurretan nahasita zeuden beste bi pertsona atzematea ahalbidetu zuten egunean zehar: 17 urteko adingabe bat eta 21 urteko gazte bat.

Antza denez, lapurrak etxebizitzan sartu eta gela batera joan ziren, bertan dirua aurkituko zutelakoan. Haatik, etxebizitzako bizilagunek aurre egin zieten eta alde egin zezatela lortu zuten, haien helburua lortu gabe.

Horrez gain, lapurreta saiakeraren biktimek delitugileetako bat atxikitzea lortu zuten Ertzaintza heldu arte. Ertzaintzak motxilan zeraman mailua hartu zion, eta, ustez, harekin mehatxuak bota zituen.