Mendizale nafar bat hil da Aragoiko Pirinioan

Iruñeko mendizale bat hil da gaur ehun metroko altueratik erori eta gero, Huescan dagoen Chinebral gailurra jaisten ari zenean. Helikopteroz eraman behar izan dute haren hilotza.

Mendizalea bere semearekin batera zegoen, eta hark deitu ditu larrialdi zerbitzuak. Dirudienez, mendizaleak izotzarekin irrist egin du, eta altuera handi batetik erori da Chinebril gailurretik Acherito parajera jaisten ari zela.

SOS-Aragón larrialdi-zerbitzua une horretan mendizaleekin lotutako beste gertakari batzuekin nahasita egon da eta Nafarroako larrialdi-zerbitzuen laguntza eskatu behar izan du, eta haiek helikoptero bat bidali dute.

Nafarroako Gobernuko helikopteroak hainbat joan-etorri egin behar izan ditu. Bai semea erreskatatzeko –Linzako (Huesca) mendi-aterpera eraman dute–, bai hilotza eramateko.

Halaber, helikopteroak hogei urteko mendizale bat ebakuatu du Belagua ingurutik Linzako aterpetxera ere, sorbaldako lokadura baitzuen.

Aterpetik Nabaskozeko suhiltzaileek Isabako osasun-zentrora eraman dute gaztea, eta,  ondoren, Nafarroako Ospitalera (Iruñea).