Elkarretaratzea deitu dute Bermeoko harrapaketa salatzeko

Bermeoko Udalak eta hainbat gizarte eragilek elkarretaratzea deitu dute gaurko, ostiralean jazotako gertakariak gaitzesteko. 20:00etan izango da bilkura, Goiko Plazan. Indarkeria matxista kasutzat jo dute eragileek gertatutakoa.

Gizonezko bat atxilotu zuten Bermeon, aitaginarreba ohia eta haren 9 urteko alaba autoarekin harrapatu eta gero. Udaltzaingoak hartu zuen atxilo ustezko erasotzailea eta Gernikako Ertzaintzaren esku utzi zuen, hilketa delitua egin duelakoan.

Ostiralean,  18:00etan, jazo zen gertakaria, Bermeon. Erasotzaileak aitaginarreba ohia eta une horretan berarekin zegoen bederatzi urteko haurra autoarekin harrapatu zituen, lekukoek adierazi dutenez. Neskatoa larri zaurituta eraman zuten Gurutzetako Ospitalera. Arriskutik kanpo dagoela jakinarazi dute erietxetik. Aitak zauri arinak ditu.

Erasoaren lekuko izan zirenek esan zutenez, atxilotuak autoarekin harrapatu zituen aita-alabak eta, ondoren, autotik irten eta ostikoka hasi zitzaion gizonezkoari. Erasotzailea Gernikako Ertzaintzaren esku utzi zuten larunbatean.