Gizartea -
Zirkuitolabur bat dela-eta
Sute batek hiru rally-auto kiskali ditu eta beste bi kaltetu Eibarren
Gertaera Asua-Erreka kaleko pabilioi batean jazo da, ez du zauriturik eragin eta ez dute inor haren etxetik atera behar izan.
Agentziak | Erredakzioa
Eibarreko industria-nabe batean Eguberri Eguneko goizean jazotako sute batek hiru rally-auto kiskali ditu eta beste bi kaltetu.
Eusko Jaurlaritzako Segurtasun sailak jakitera eman duenez, sutea 7:50ak aldera hasi da, zirkuitolabur batengatik seguruenik, Asua-Erreka kaleko pabilioi batean. Bertan rally-lasterketetan lehiatzen diren autoak aparkatzen dituzte.
Suteak autoetako hiru kiskali ditu, eta kalteak eragin dizkie beste biri; ez da zauriturik izan eta ez dute inor haren etxetik atera behar izan.
Segurtasun sailak azaldu du 9:00ak aldera amaitu direla suhiltzaileak sutea itzaltzen.