Banku batean lapurreta egin dute armak erabiliz, Bilbon

Bi gizonezko atxilotu dituzte gaur goizean Bilbon, armak erabiliz banku bat lapurtzeagatik. Lapurrak "butron" metodoa erabiliz sartu dira banketxearen egoitzaren ondoko garaje batetik, Herrizaingo Sailak jakitera eman duenez.

08:05ean, Ertzaintzak Santutxu auzoko banku bateko alarmaren abisua jaso du. Bertaratu direnerako, ertzainek bi gizonezko ikusi dituzte bankuari itsatsita dagoen garaje batetik ateratzen eta lapurretaren biktimek emandako deskribapenarekin bat egiten zuten.

Horiek identifikatu eta bi poltsatan pistola bat, dirua, lanerako buzoak eta buru-berokiak zeramatzatela ohartu dira, eta atxilotu egin dituzte lapurreta egitea leporatuta.

Agenteek jakin ahal izan dutenez, bi pertsona horiek "butron" metodoa erabilita sartu dira bankuan, ondoko portalean zuloa eginda. Barrura sartzea lortu dutenean, langileei itxaron diete eta pistolaz eta labanaz mehatxu eginda, dirua eraman dute sukurtsaletik.