Gautena Gipuzkoako autismo elkartea, Europako Herritar Saria

Autismoa duten pertsonak eta haien familiak Gipuzkoan artatzen dituen Gautena elkarteari Europako Herritar Saria ematea erabaki zuen asteazkenean Europako Parlamentuak, Bruselan.

Izaskun Bilbao Barandika euskal eurodiputatuak hautagaitza aurkeztu zuen. Proactiva open arms elkartearekin eta Itsuen Erakunde Nazionalarekin (ONCE) saria partekatuko du Gautenak. Proactiva open armsek errefuxiatuak itsasoan erreskatatzen ditu.

Saria 2008tik banatzen du Europako Parlamentuak. “Balio europarren aldeko borroka, herritarren eta Estatu kideen arteko integrazioa bultzatu edo lankidetza errazten duten erakundeak” saritzen ditu, “Oinarrizko Eskubideen EBko Gutunaren balioak egunero sustatzen dituztelako”.

Guztira, 28 estatu kideetako 50 erakunde saritzen ditu urtero. Sari banaketa urriaren 12 eta 13an izango da Europako Parlamentuan, Bruselan.