Arratiatik Urkiolarako errogatiba ekainaren 18an egingo da

Datorren larunbatean, hilak 18, Arratiako oinezko errogatiba egingo dute Urkiolara, San Antonioren santutegira. Lehenago herri bakoitzak bere errogatiba antolatzen bazuen ere, azken urteotan, Arratiako parrokia guztiak aldi berean joaten dira.

Urkiolara joateko bi ibilbide desberdin prestatu dituzte aurten. Horrenbestez, bi irteera egongo dira: lehenengoa Dimako plazan izango da goizeko 06:00etan, eta, bigarren irteera Zeanuriko plazan, 07:30ean. Martxa normalean, hiru ordutan baino zertxobait gehiagotan egin daitekeen ibilbidea da.

Egitarauari dagokionez, 11:00etan ongietorria emango zaie oinez, autobusean edo kotxez bertaratutako herritar erromesei. Ondoren, letaniak abestuz sartuko dira Urkiolako santutegira.

Era berean, Mankomunitateak lau autobus antolatu ditu Urkiolara igotzeko eta kotxe pilaketarik ez egoteko. Autobusean etorritakoak euren herritara itzuliko dira 13:00etan.