Atxilotu bat Orion, bikotekideari erasotzeagatik

Ertzaintzak 30 urteko gizon bat atxilotu du bikotekideari erasotzea eta alkoholaren eraginpean auto bat gidatzea egotzita. Atxilotuak delitu aurrekariak ditu Frantzian; gainera, gidabaimena kenduta du herrialde horretan. Gertakariak 01:00ak aldera jazo dira Orion. Herritar batzuek Ertzaintza ohartarazi dute, gizon bat emakume bat jotzen ari zela ikusi baitute ostalaritza establezimendu batean.

Ustezko erasotzailea bikotekidearen autoan alde egiten saiatu da. Halere, ertzainek susmagarria aurkitu dute, aparkalekutik biribilgune baterantz atzerako martxan, alde batetik bestera eta gehiegizko abiaduran zihoala.

Agenteek gidaria identifikatu dute, eta edari alkoholdunen eraginpean zegoela erakusten zuten sintoma argiak zituela ohartu dira; gizonak oreka mantentzeko zailtasunak zituen.

Ondoren, agenteak ostalaritza lokalera joan dira, aipatutako erasoa gertatu den baieztatzeko. Bertan, aurpegia gorrituta eta lepoan urradurak zituen emakumezko bat aurkitu dute. Dirudienez, gizonak oinarekin jo zuen, lurrean zegoenean. Biktima anbulatorioan artatu dute.

Bestalde, patruilak ustezko erasotzailea atxilotu egin du, genero indarkeriaren eta bide segurtasunaren kontrako delituak egotzita. Atxilotua Azpeitiko Guardiako Auzitegiaren esku geratu da.

Genero indarkeriaren biktima diren emakumeei laguntzeko telefono zerbitzua: 900 840 111 - 016