Gizartea -
Emakumeen aurkako indarkeria
Gizon batek bikotekidea hil du Torreviejan
Atxilotu duten gizon batek bere neska-laguna hil eta gorpua ezkutatu izana aitortu du, Poliziak emakumearen gorpua eraikin bateko kontagailuen gelako hormen artean ostenduta aurkitu eta gero.
Agentziak | Erredakzioa
Duela bi hilabetetatik desagertuta zegoen txiletar jatorriko emakume baten gorpua aurkitu du Poliziak Torrevieja Alacanteko herrian, eraikin bateko kontagailuen gelako hormen artean ezkutatuta. Mutil-lagunak hil zuen emakumea, gizonak berak aitortu duenez, eta Poliziak atxilotu egin du.
Ikertzaileek azaldu dutenez, atzo, asteazkenean, aurkitu zuten gorpua, 12:30 inguruan, gelatik zetorren kiratsak eta bertan zegoen intsektu piloak arreta erakarrita.
Kontagailuen gelara sartu zirenean, agenteek “eraikitako zerbait, sarkofago itxurako zer edo zer”, topatu zuten paretan, eta, hura eraitsitakoan, emakumearen gorpua agertu zen.
Hilotza topatutakoan, bikotekidea atxilotzera joan ziren, eta horrek hil izana aitortu zuen.
Senideek duela bi hilabete desagerpena salatu zutenetik, emakumearen bila ari ziren.
Doako telefono zenbakiak
Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan). Doakoak dira eta ez dute arrastorik uzten fakturan.
