Hezkuntza Sailak erlijio islamiarreko irakasleen zerrenda ireki du

Eusko Jaurlaritzaren Hezkuntza Sailak zentro publikoetan erlijio islamiarreko eskolak emateko irakasleak edukitzeko zerrendak ireki ditu lehenengo aldiz.

Irailaren 9an kaleratutako deialdiaren arabera, hautagaiek Haur, Lehen eta Bigarren hezkuntzetarako egin dezakete eskaera.

Haur eta Lehenengo Hezkuntzarako, irakasle titulua edo parekoa eta euskararen Bigarren mailako Eskakizuna exijitzen dute.

Gainera, Espainiako Batzorde Islamiarrak igorritako egokitasun proposamen bat ere izan beharko dute, hori baita erlijio islamiarreko komunitateen ordezkaria Administrazioaren aurrean.

Bigarren Hezkuntzaren kasuan eskakizun bera egiten da, baina gutxienez lizentziatura bat edo dagokion gradua izan beharko dute, ikasketa pedagogikoarekin eta didaktikoarekin batera.

2016-2017 ikasturtera arte, euskal zentro publiko guztietarako bi irakasle besterik ez zegoen, eta eskola horiek jasotzeko nahikoa ikasle zituzten eskola guztietara joaten ziren.

Iaz, EAEko eskola publikoetan 1.270 ikaslek eskatu zituzten erlijio islamiarreko ikasketak, eta 180.000 erlijio katolikoa edo besteren bat.