Bilboko Eskolapioak ikastetxea hustu dute akats elektriko batengatik

Bilboko Eskolapioak ikastetxea jendez hustu dute gaur eguerdian, kea ikusi ondoren. Koadro elektriko batean gertatutako akats baten ondorioz, kea sortu da, eta, badaezpada, ikasle, irakasle eta langileak ikastetxetik atera dituzte.

Gertaera eguerdiko hamabiak pasatxoan gertatu da. Antza denez, ikastetxeko arduradunak sotoan dagoen koadro elektriko batetik kea irteten zela ohartu dira, eta Bilboko suhiltzaileei deitu diete, Bilboko Udaleko iturriek jakinarazi dutenez.

Surik piztu ez bada ere, badaezpadako neurri gisa eta kea sortu denez, ikasleak patiora atera dituzte.

Bilboko suhiltzaileak bertaratu dira, arazoa konpondu eta ikasleak ikasgeletara lehenbailehen itzultzeko.