Gizartea -

'Bidesaria' sistema

Heldu da tarifa finkoa Bizkaiko bidesarietara: gehienez 30 euro hilean

Gehiago gastatzen dutenei dirua itzuliko zaie. Gainerakoek ere deskontuak izango dituzte, % 45erainokoak.

AP-8a egunero erabiltzen dutenek 30 euro ordainduko dituzte gehienez. EiTB
AP-8ko Bizkaiko bidesariak. EiTB
AP-8a egunero erabiltzen dutenek 30 euro ordainduko dituzte gehienez. EiTB

Agentziak | Erredakzioa

Whatsapp Facebook Twitter Telegram Email

Urtea hastearekin batera, 2017ko urtarrilaren 1ean, bidesari sistema berria sartuko da indarrean Bizkaian, eta tarifa finkoa edukiko du. AP-8ko, Bilboaldeko Metropoliaren Hegoaldeko Saihesbideko eta Artxandako tuneletako erabiltzaileek gehienez ere 30 euro ordainduko dituzte hilean.

Horrez gain, kopuru horretara heltzen ez direnek ere, laguntzak izango dituzte: 11. bidaiatik aurrera, % 35eko deskontua izango da, eta 26. bidaiatik aurrera, % 45ekoa.

Noiz, non eta nola?

Diru-laguntzak jasotzeko sistema honen onurak jasotzeko, Interbiak enpresako bulegoetan edo, berrikuntza gisa, bizkaia.eus webgunearen bitartez egin beharko dute eskaria erabiltzaileek, abenduaren 1etik aurrera.

Eskatzaileek hiru baldintza bete behar dituzte: Bizkaian bizi den pertsona fisikoa izan behar dute (enpresak sistematik kanpo daude), Via T gailua izan behar dute matrikula jakin bati lotuta eta ordainketak Via T sistemaren bitartez egin behar dituzte.

Honako agiriak aurkeztu behar dira sisteman alta emateko: nortasun-agiria, ibilgailuaren zirkulazio-baimena eta Via T gailua dugula ziurtatzen duen bankuko egiaztagiria.

Imanol Pradales Ekonomi eta Lurralde Garapena Sustatzeko diputatuak jakinarazi duenez, ordainlekuetan kamerak jartzen ari dira, matrikulak irakurri eta Via T gailua sisteman altan emandako matrikulari lotuta dagoela egiaztatzeko, balizko iruzurrak saiheste aldera.

Zazpi euro urtean, Via T sistemagatik

Bestalde, Bizkaiko Foru Aldundiak eta hainbat finantza-erakundek akordioa adostu dute. Akordio horri esker, Via T gailua doan emango dute, eta urtean 7 euro ordaindu beharko dira hura mantentzeko. Bezero berrientzat, lehenengo urteko kuota 5 eurokoa izango da, eta 7 eurokoa, hurrengo urteetan.

30 euroko langa gainditzen duten erabiltzaileei hilabete amaieran itzuliko zaie dirua.

Bizkaiko Foru Aldundiaren arabera, 24.800 bizkaitarrek erabil dezakete sistema berri hau. Gaur egun, 8.000 bizkaitarrek erabiltzen dute.

Hau zure interesekoa bada, baliteke beste gai hauek ere izatea
Bizkaia EAE albisteak Gizartea albisteak Gaurko titularrak A8 autobidea gaur Dirulaguntzak gaur Bizkaiko Foru Aldundia azken ordukoa