Gizartea -
HIESA-ren aurkako eguna
GIBaren 'genozidioa': Milioi bat hildako baino gehiago 2015ean
NBEk tolerantziarako eta kontzientziaziorako deia egin du gaixotasuna erabat desagerrarazteko. Erakundearen erronka: 2030ean hildakorik eta gaixorik ez egotea.
Agentziak | erredakzioa
2015. urtean, milioi bat pertsona baino gehiago hil ziren Giza Immunoeskasiaren Birusarekin (GIB) lotutako gaixotasunengatik, horietatik 100.000 haurrak ziren, heriotza kopuruak beheranzko joera hartu badu ere, eta 2005etik % 45 murriztu badira ere.
2030erako 30 milioi pertsonak sendagaia eskuratu ahal izatea da NBEren lehentasunetako bat, eta garapen jasangarriaren agendaren helburuen artean sartuta dago.
"Tolerantzia eta kontzientziazioak lagunduko dute gaixotasuna desagerrarazten", esan zuen Ban Ki-moon Nazio Batuen Erakundeko idazkari nagusiak, NBEren egoitzan bertan Hiesaren aurkako Borrokaren Nazioarteko Egunaren bezperan egindako ekitaldi batean.
Ban Ki-moonen arabera, helburua lortzeko, beharrezkoa da komunitate ahulenak babestea: Afrikako Saharaz hegoaldeko emakume gazteak, gizonekin sexu-harremanak dituzten gizonak eta "zerbitzu eta zaintzarako sarbidea ez duten pertsona txiroak".
ONUSIDA NBEren Hiesaren aurkako Borrokaren Programaren arabera, 37 bat milioi lagun bizi dira GIBak kutsatuta, baina bitik batek bakarrik daki gaixo dagoela.
ONUSIDAk dioenez, zenbait eskualdetako GIBaren proba kopuru txikiak, bazterketak eta kontzientziaziorik ezak eragin du datu hori.
NBEko idazkari nagusiak nabarmendu zuenez, NBEren konpromisoa "inor atzean ez uztea da", eta 2030. urterako GIBaren ondorioz heriotzarik, bazterketarik eta gaixorik ez egotea dela gaineratu zuen.
Hala, "mundua osasunagoa eta zorionekoagoa" bilakatzeko ahaleginak batuko dituela adierazi zuen, talde sozial guztien duintasuna babestua eta errespetatua izan dadin, eta, egoera soziala eta bizi diren herrialdearen egoera gorabehera, mundu guztiak sendagaiak eskuratzeko aukera izateko.
"Hiesaren epidemia ez da bukatu, baina lor dezakegu", esan zuen Naomi Campbell modelo eta ekintzaileak aipatutako ekitaldian.
"Gaur elkartasuna adierazi nahi diet hiesa pairatzeko arriskua duten milioika emakume eta nerabeei. Mehatxu hirukoitza dute: GIBa dutela ez jakitea, sendagaiak lortzeko aukera ez izatea eta kutsatzeko arriskuaren aurrean babesik ez izatea", gaineratu zuen.
Bestalde, Ban Ki-moonen agintaldian (2007an hasi zen) lortutako aurrerapausoak nabarmendu zituzten. 2016ko ekainean 18,2 milioi lagunek izan zuten sendagaia jasotzeko aukera; 2015ean, 15,8 milioi izan ziren, eta 2010ean, 7,5 milioi.
