1.500 marihuana landare atzeman dituzte Astigarragan

1.547 marihuana landare eta droga hazteko material ugari atzeman ditu Ertzaintzak Astigarragako industria-nabe batean (Gipuzkoan), Eusko Jaurlaritzako Segurtasun Sailak ohar baten bidez jakinarazi duenez.

Iturrion arabera, pertsona bat ikerketapean dago, osasun publikoaren kontrako delitua eta elektrizitate-sarearen iruzurrezko erabilera egin izana egotzita (plantazioak legez kanpoko konexioa zuen). Ertzaintzak ez du baztertu pertsona gehiago inputatzea.

Otsailaren 5eko goizaldean atzeman zuten plantazioa. Industria-nabearen beheko solairua bost gelatan zuten banatua, eta goikoa, bakarrean. Marihuana landatzeko eta hazteko gailu ugari topatu zituzten bertan agenteek: lanparak, ureztatzeko sistemak, tenperatura kontrolatzeko gailuak...

Guztira, 1.547 landare, 600 watteko 100 lanpara eta 21 haizemaile konfiskatu zituzten. Geletako bat marihuana lehortzeko erabiltzen zuten, eta bahetu eta pisatzeko gailuak zituzten bertan.