Gizartea -
Emakumeen kontrako indarkeria
Emaztea sastatu eta bere burua zubi batetik behera bota du, Zaragozan
Gizonezkoa, 75 urtekoa, eta emakumea, 78koa, larri zaurituta daude, eta Zaragozako ospitale batera eraman dituzte.
Erredakzioa
75 urteko gizon batek 78 urteko emaztea sastatu du gaur goizean Zaragozan, euren etxebizitzan, eta gero, Aragoiko hiriburuko Hirugarren Ingurabideko zubi batetik behera bota du bere burua. Biak larri zaurituta daude, eta hiriburuko ospitale batera eraman dituzte, Poliziaren arabera.
Erasoa 12:00etan izan da, senar-emaztearen etxebizitzan. Ustezko erasotzaileak labankada batzuk eman dizkio biktimari gorputzeko hainbat lekutan eta zauri oso larriak egin dizkio.
Emaztea zauritu ondoren, ustezko erasotzailea Zaragozako Hirugarren Ingurabideko zubi batera joan da eta bere burua handik behera bota du. Ondorioz, larri zaurituta geratu da.
Etxebizitzara joan diren agenteek emakumea lurrean aurkitu dute, odol-putzu batean. Arma zuri batekin egindako zauriak zituen, eta kolpeak buruan, lurrera erori denean egindakoak antza.
Zaragozako Polizia Judizialak ikerketa hasi du gertakari horiek argitzeko, baina dagoeneko jakin ahal izan denez, emakumeak ez du inoiz inolako salaketarik jarri senarraren kontra.
Tratu txarrak jasan dituzten emakumeentzako arreta zerbitzua: 016
