Gizartea -
Lepoan zauriak
Gizon bat atxilotu dute Donostian bikotekidea jotzea leporatuta
Emakumeak adierazi duenez, eztabaida sutsu bat izan ostean, gizonak lepotik heldu eta ohearen kontra bultzatu du. Ustezko erasotzaileak gertaeraren alde bat onartu du.
Erredakzioa
46 urteko gizonezko bat atxilotu zuten atzo, ostirala, genero indarkeria delitu bat leporatuta, eztabaidatzen ari zenean bikotekideari eraso egiteagatik, lepoan zauriak eraginda, Herrizaingo Sailaren arabera.
Erasoa 15:15 aldera gertatu zen Gipuzkoako hiriburuan, Egia auzoko etxebizitza batean. Ertzaintzak patruila bat bidali zuen, emakume batek tratu txarrak jasan zituela jakin ondoren.
Etxebizitzara iritsitakoan, agenteak emakumearekin harremanetan jarri ziren. Lepoaren bi aldetan ez ezik, bularraldean ere zauriak zituen. Emakumeak ertzainei jakitera eman zienaren arabera, bikotekidearekin eztabaida sutsua izan ostean, gizonak lepotik heldu zion eta ohearen kontra bultzatu zuen, eta irainak eta mehatxuak egin zizkion. Ustezko erasotzailea identifikatu ondoren, bikotekideak egindako adierazpenen zati bat onartu egin zuen horrek.
