Gizartea -
Ereagako hondartzan (Getxo)
2016an Mediterraneo itsasoan 5.000 errefuxiatu hil zirela salatu dute
Bizi hobe baten bila etxeak uzten dituzten pertsona askok itsasoan murgildu eta bizitza jokoan jartzen dutela salatu du Ongi Etorri Errefuxiatuak plataformak.
Agentziak | Erredakzioa
Errefuxiatuei elkartasuna adierazteko performance bat egin du larunbat goiz honetan Ongi Etorri Errefuxiatuak plataformak Ereagako hondartzan (Getxo, Bizkaia). Halaber, 2016an haien jatorrizko herrialdea utzi behar izan zuten 5.000 pertsona baino gehiago Mediterraneo itsasoan hil zirela salatu du.
"Bizi hobe baten bila haien etxeak uzten dituzten pertsona asko" bidean hiltzen direla irudikatu nahi izan dute Ereagako hondartzan. Hala, 'Itotako amets gehiagorik ez' lelopean, ehunka lagunek hartu dute parte ekimen horretan.
"Ikaragarria da haien eskubideak errespetatu ahal izateko itsasoan murgildu behar izatea, kalitate eskaseko ontzietan haien bizitza jokoan jartzen dutelarik", salatu dute. Ildo horretatik, errefuxiatuek "halabeharrez" egiten dituzten "ihesaldi" horiek "logika handia dute haien biziak heriotzarekin lotura estua duenean eta beste saiakera bat egiteak ez duenean asko axola".
Era berean, Europako Parlamentuak emandako irizpidearen kontra eta Espainiako Gobernuaren babespean Santurtziko portutik "Arabia Saudi bezalako diktadurarekin armekin trafikatzen" dela salatu du Ongi Etorri Errefuxiatuak plataformak.