Bilboko prostitutek ezingo dute kalean lan egin

Bilboko Udaleko bilkurak Espazio Publikoaren Ordenantza onartu du. Arau berriak sexu-zerbitzuak eskaintzea, "gizalegerik gabeko" jarduera sexuala eta sexua kalean praktikatzea debekatzen ditu.

Ordenantzak debekatu egiten ditu "herritarrei eraso egitea oso egintza intimoak eta pertsonalak jendaurrean erakutsiz", eta "ageriko sexu-harremanak bide publikoan eta begien bistan egitea, ez konturatzeko moduan egiten ez bada behintzat".

Arau berriak "ordainpeko sexu-zerbitzuak adostea helburu duten eskaintza eta eskaria ekintzak" ere debekatzen ditu.

Espazio Publikoaren Ordenantza egiteko, terrazak, garbiketa, zirkulazioa, salmenta ibiltaria, kale-edana eta hirigintza-lizentziak arautzen dituzten udal arauak moldatu eta neurri berriak gehitu dituzte.

Bilbon Kaleak Aske plataformak manifestazioa deitu du, larunbatean, ordenantza honen aurka protesta egiteko; izan ere, plataformaren ustez, neurriarekin "turistentzat eta biltzarkideentzat, eta ez bertan bizi direnentzat, pentsatutako hiri bat sortu nahi dute".