Gizartea -
Soraluze (Gipuzkoa)
AP-1 autobideak lau ordu eman ditu itxita bi kamioik talka egin ondoren
Istripuan bi kamioilariak zauritu dira, horietako bat ibilgailuaren kabinan harrapaturik geratu da eta suhiltzaileek erreskatatu behar izan du
AGENTZIAK | ERREDAKZIOA
AP-1 autobidea berriz zabaldu dute lau ordu itxita eman ondoren. Bi noranzkoak itxi behar izan dituzte bi kamioik talka egin ondoren, Soraluzen (Gipuzkoa).
Eusko Jaurlaritzako Segurtasun Sailak jakitera eman duenez, AP-1 19:15ean berriro zabaldu dute, Iveco eta Volvo kamioiak errepidetik kendu dituztenean. Talka 15:20 aldera gertatu da, lanetan dagoen tarte batean, 145. kilometroan.
Istripuan bi kamioilariak zauritu dira, horietako bat, 43 urteko gizona, ibilgailuaren kabinan harrapaturik geratu da eta suhiltzaileek erreskatatu behar izan dute. Helikopteroan Gurutzetako ospitalera eraman dute.
Beste gidaria, 51 urteko gizona, Arrasateko Debagoiena ospitalera eraman dute anbulantzian.
Zirkulazioa Bergaratik desbideratu dute, GI-627 errepidera, Donostiako noranzkoan. Bitartean, Gasteizko noranzkoan auto-ilara luzeak izan dira eta AP-8aren Eibar-Elgoibar tarteari ere eragin diote.
