Atxilotuta, bikotekide ohiari errebolber batekin mehatxu egiteagatik

Bermeko ertzain-etxeko agenteek gizon bat atxilotu dute Busturian, genero indarkeriaren delitu bat egotzita, ustez bikotekide ohia jotzeagatik. Gainera, gizonak pistola batez mehatxu egin ziola salatu zuen emakumeak. Arma (jaurtigairik gabeko errebolber bat) gertakariak jazo ziren ibilgailuaren maletategian aurkitu zuten.

Atzo, larunbata, 13:00 aldera, Axpe auzoan (Busturian) gertatzen ari zen liskar batean esku-hartzeko eskatu zieten Ertzaintzaren agenteei. Heltzerakoan, ertzainek gizon bat aurkitu zuten errepidean eta, metro gutxira, emakume bat, auto baten barruan.

Biktimaren salaketan jasotzen denez, gizonak emakume hura (bikotekide ohia) jo zuen; hain zuzen, kolpe bat eman zion aurpegian, eztabaidan ari zirela. Hori dela eta, emakumeak osasun-laguntza behar izan zuen.

Gizonak berreskuratu nahi zituen bitxi batzuk zirela-eta hasi omen zen bion arteko eztabaida. Emakumeak agenteei jakinarazi zienez, gertakarien egileak pistola batez mehatxu egin zion eta berak artazi batzuk hartu zituen, bere burua defendatzeko.

Ertzainek jaurtigairik gabeko errebolber bat aurkitu zuten autoaren maletategian, gizonak emakumea uztez mehatxatzeko erabili zuena; horrez gain, 20 zentimetroko sukaldeko aizto bat ere atzeman zuten agenteek. Denbora gutxira, gertakarien ustezko egilea (48 urteko gizon bat) atxilotu egin zuten, genero indarkeriaren delitu bat egotzita.