Trafiko aldaketak, Behobia-Donostia lasterketa dela eta

Datorren azaroaren 12an, igandean, 53. Behobia-Donostia lasterketa dela eta, errepideetan eragin nabarmena izango duten ezinbesteko trafiko aldaketak izango dira.

Lasterketa Behobian hasiko da, nazioarteko zubi ondoan; 10:15ean oinez doazen korrikalariak aterako dira; aurretik, 09:45ean, gurpil-aulkian doazenak eta 09:50an patinatzaileak abiatuko dira. Lasterketa GI-636 errepidean gauzatuko da osorik; Gaintxurizketa igo, Errenteriatik igaro eta Pasai Antxora helduko dira partehartzaileak; hortik, Donostian sartuko dira Buenavista hiribidetik. Ondoren, Mirakruzetik, Ategorrietatik eta Zurriolatik pasoko dira Boulevarden bukatzeko.

Aldaketak trafikoan

Goizeko 06:30etatik aurrera, GI-636 errepidearen Oxin-Biribil eta Behobia biribilguneen arteko zatia itxita egongo da. Ibilgailuentzako saihesbidea jarriko dute Irungo 54. Poligonoan, eta ibilgailu astunak A-8 errepidetik joango dira.

Goizeko 08:30etik aurrera, Gaintxurisketa gainetik pasako da lasterketa eta hortik aurrera trafikoa desbideratuko dute: zirkulzio-errei bat (Irunerako bidean) korrikalarientzat erabiliko dute, eta bestea (Donostiarako bidean) ibilgailuentzat, GI-2638 errepidearekin (Lezo Gaintxurisketa) lotuko duena.

Halaber, GI-636 errepidean, Gaintxurisketa gaineko hasiera ( 7,9 kilometroan) eta Altamira (5 kilometroan) arteko tartea itxita egongo da bi noranzkoetan. Saihesbidea jarriko dute GI-2638 errepidean (Gaintxurisketa-Lezo-Altamira biribilgunea), GI-636 errepidera berriro sartu ahal izateko, Bosko tunelaren parean.