Sei ibilgailu kiskali dira Bilboko garaje batean izandako sutean

Sutea piztu da bart Bilboko Miribilla auzoko garaje batean, eta sei ibilgailu kiskali dira.

Garrak 01:00a aldera piztu dira Askatasun kaleko 12. zenbakia duen eraikineko garajean, bigarren solairuan.

Bilboko Suhiltzaileak eta Udaltzaingoa bertaratu dira, eta, badaezpada, 12. eta 13. zenbakia duten atarietako 54 bizilagunak etxetik atera, eta Miribillako kiroldegira eraman dituzte.

Zorionez ez da inor zauritu, baina sei pertsona (lau bizilagun eta bi udaltzain) bertan artatu behar izan dituzte, kea arnastu baitute.

Sua 07:00ak aldera amatatu dute, baina ke ugari sortu da.

 

 

Ordu horretan etxera itzuli ahal izan dira bizilagunak, baina pare bat egun itxaron beharko dute garajeetara sartzeko.