Gizartea -
Emakumeen aurkako indarkeria
Sexu-abusuen aurkako diru funts bat sortu dute Hollywoodeko emakume aktoreek
300 emakume baino gehiagok, besteak beste, Meryl Streep, Reese Witherspoon, Jennifer Aniston eta Eva Longoria aktoreek, baliabiderik ez duten emakumeei laguntzeko funts bat sortu dute.
Agentziak | Erredakzioa
Hollywoodeko 300 emakume boteretsu baino gehiagok, besteak beste, Meryl Streep, Reese Witherspoon, Jennifer Aniston eta Eva Longoria aktoreek, diru funts bat martxan jarri zuten astelehenean, sexu-abusuen aurrean baliabiderik ez duten emakumeei defendatzen laguntzeko.
Ekimena #MeToo (Ni ere) mugimendutik abiatu da. Sexu-abusuak salatzeko dei egiten die mugimenduak mundu guztiko emakumeei. Ekimenak indarra hartu zuen, Harvey Wenstein zinema produktorearen aurkako akusazioen berri izan ondoren.
The New York Times eta La Opinion egunkarietan argitaratutako gutun batean, aktore, zuzendari, produktore eta zinema, telebista eta antzerki industriako langileen koalizioa AEBko beste ekonomia sektoreetan lanean ari diren “ahizpei” zuzentzen zaie.
“Soldata baxuko industrietan lanean ari diren emakumeen ahotsari, botereari eta indarrari bultzada eman nahi diegu, indarkeriaren eta esplotazioaren aurrean ahulagoak direlako, ez baitute egonkortasun finantzierorik”, adierazi dute gutunean.
Horretarako, 'Time's Up' ('Denbora bukatu da') defentsarako funtsa martxan jarri dute. Dagoeneko 13 milioi dolar bildu dituzte. Soldata baxuak dituzten emakume horiek lagundu nahi dituzte, sexu-abusuak salatzeagatik izan ditzaketen ondorioen aurrean.